..
Veggfóðrið frá Sian Zeng er ekki bara gullfallegt heldur er það líka segulmagnað og fylgja með segulræmur sem hægt er að festa aftan á teikningar og annað smálegt
Skemmtilegt fyrir börn, og fullorðna, til að búa til sinn eigin ævintýraheim!
Origami veggfóður frá merkinu Dottir & Sonur
Ferm Living
Kemur ekkert að sök þó að krakkarnir kroti aðeins á vegginn , kemur örugglega bara skemmtilega út á þessu hressa veggfóðri.
og eitt gamalt og gott frá Ferm Living.
***
Einfalt pakkadagatal! Sætar gjafir, pakkaðar inn í einfaldan maskínupappír, merktar með stimplum og skreyttar með pínulitlum fánaborðum!
Mínimalisminn í fyrirrúmi! Umslög fest á spjald og litlir glaðningar í hverju umslagi – þetta ættu allir að geta gert. Þessi umslög eru einstaklega falleg, partýbleik að innan.
Hér er ekkert leyndarmál hvað bíður þín næsta dag. Krúttlegt skrautdagatal sem leyfir þér að skreyta jólatréð í rólegheitunum yfir desembermánuð.
***
Hversu dásamlegt er þetta barnaherbergi?
Ég elska þetta veggfóður, og snilldin er að þurfa ekki að negla fyrir neinum römmum. Mjög krakkavænt líka og gaman að geta haft myndir beint yfir rúminu án þess að þurfa að hafa áhyggjur af jarðskjálftum. Auðvitað þarf ekki að setja upp veggfóður og hægt að teikna beint á vegginn þess vegna, nota teip eins og Svana á Svart á hvítu benti á, en japönsk pappírsteip skilja víst ekki eftir sig lím og leiðindi á veggnum.
Loftbelgirnir eru frá Authentic Models og fást á Amazon
Bókahillan gullfallega er frá PB Teen
Tunglplakatið yfir rúminu er frá Kranky Crab
***
Eitt af því dásamlega við jólin eru fallegu hlutirnir sem hægt er að skreyta með. Í sætu búðinni Suomi PRKL! Design á Laugaveginum fást til dæmis birkikristallar frá Valona.
Þessi bjútí mega að mínu mati hanga uppi allt árið – svo flott!
Í vor hafði Sigþrúður Gunnarsdóttir, ritstjóri barnabóka hjá Forlaginu, samband við mig og lét mig fá handrit að bók um hvolpinn Hvata. Höfundurinn er Eva Þengilsdóttir, en hún hefur skrifað barnaefni fyrir sjónvarp, kirkjustarf og leikskóla og þróaði efnið um Hvata hvolp í samstarfi við Æfingastöð Styrktarfélags lamaðra og fatlaðra.
Karakterinn Hvati varð til fyrir nokkrum árum og er handbrúðan Hvati Hvolpur til á ótal heimilum um allt land og er til sölu í Hagkaup!
Og nú er bókin okkar Evu komin í búðir 
Gæti ekki verið glaðari með útkomuna!
Stóra stoltið mitt með litla stoltið mitt !
Hreyfing er mikilvæg á öllum æviskeiðum og stuðlar að betri heilsu og aukinni vellíðan. Þessi bók er hugsuð sem skemmtileg lesning fyrir börn en jafnframt tæki fyrir foreldra og þá sem vinna með börnum til að ýta undir markvissa hreyfingu, þroska og tengslamyndun.
Hvati fæst í öllum helstu bókabúðum, bókaverslun Forlagsins, hjá Styrktarfélagi lamaðra og fatlaðra og auðvitað í Hagkaup ásamt handbrúðunni sætu 
Beta mágkona mín er hugmyndarík móðir tæplega tveggja ára drengs sem heitir Arnaldur Kjárr. Herbergið hans er að verða rosalega fínt og nú á hann sitt eigið litla hús inn í herberginu. Betu hafði langað að gefa syni sínum hús og ákvað að nýta í það lítið ikea borð sem var á leiðinni á haugana. Hún skellti sér í Ólátagarð og fékk aðstoð við sníðagerð og keypti þar fata- og föndurlím. Því næst tók hún tvenn rúmföt sem hún notar aldrei, klippti og límdi allt saman og þurfti ekki að sauma eitt einasta spor! Efninu var skellt yfir borðið og allt fest tryggilega svo enginn geti slasað sig. Ekkert efni er á hliðinni sem snýr að veggnum svo þar er hægt að hengja upp myndir og fleira skemmtilegt. Inn í húsinu er útbreiddur gærupoki og púðar svo þar er orðið ansi kósý, auk þess sem húsið stendur á gervigrasi – hversu skemmtilegt er það!?
Framkvæmdin tók um tvær kvöldstundir og næsta skref segir Beta vera að kaupa díóðuperur (sem hitna ekki) og setja inn í húsið!
Love it!
Hérna eru fleiri skemmtileg krakkahús!
***
Ég verð voðalega meyr þegar afmæli einkasonarins nálgast. Nú er rúmur mánuður í þriggja ára afmælið, sem er auðvitað ótrúlegt því það er eins og hann hafi fæðst í gær. Í fyrra fékk hann þennan litla kassa í 2ja ára afmælisgjöf frá mömmu sinni.
Stuttu áður hafði ég setið frammi í stofu og hlustað á þá feðga spjalla saman inn í herbergi þegar pabbinn segir við soninn: “Veistu hvernig þú varðst til Darri Freyr?” – Mér krossbrá og fannst drengurinn fullungur til að læra á býflugurnar og blómin. En sagan sem kom á eftir var svo yndisleg að ég varð að gera eitthvað við hana.
Svo ég klippti út söguna af því hvernig við urðum fjölskylda:
(Þarna á að standa 15. sept en það rifnaði aðeins af. 15.sept 2002 fann ég manninn minn í Osló)
Mamma og pabbi elskuðu hvort annað svo mikið að hjartað hennar mömmu stækkaði…
… og stækkaði
þar til það skipti sér í tvennt…
og þannig varðst þú til…
29. okt 2009 – 18 merkur – 54 cm – Darri Freyr
***
Ég elska sniðugt fólk sem tekur sér tíma til að búa til leikföng handa/með börnunum sínum!
Ikea skóhillurnar eru ódýr og skemmtilegur efniviður sem auðvelt er að breyta
Nokkrum spítum bætt við…
Litríku efni skellt yfir…
Og körfur fylltar með litríkum dótaávöxtum og -grænmeti! Einfaldlega æðisleg dótabúð!
Brasilíski húsasmiðurinn Dalton Ghetti var aðeins 9 ára gamall þegar hann byrjaði að skera út með hnífum og höggva í tré með hamar og meitli. Fyrst um sinn vann Ghetti stóra skúlptúra en árið 1986 vildi hann ögra sér, tók upp blýant sem lá á vinnuborðinu og byrjaði að skera út. Blýantana finnur hann yfirleitt úti á götu og sker út í þá með pínulítilli saumnál eða örlitlum hníf og útkoman eru örsmáir blýskúlptúrar sem ótrúlegt er að manneskja hafi skapað.
Útskurðurinn reynir mjög á augun svo Ghetti eyðir ekki meira en 1-2 klukkustundum á dag í blýantana sína. Það tekur því oft mánuði og jafnvel ár að vinna í blýöntunum sem eru ekki til sölu heldur eingöngu unnir fyrir hann sjálfan.
Magnað!
Hægt er að kaupa myndir af blýantaskúlptúrunum hér.
Þetta skemmtilega leikherbergi er eitt af því flottara sem ég hef séð.
Hvaða krakka langar ekki í rólu inni!
Í herberginu er pallur með borði sem hægt er að festa upp á vegg til að hafa meira leikpláss
Á pallinum eru ótal hólf og hirslur! Algjör snilld að hafa pall með geymsluplássi í herbergjum barnanna þar sem þau nýta ekki alla lofthæðina.
Beint úr Hundrað ekru skógi Bangsímons og félaga!
Og auðvitað eru hlerarnir ekki einskis nýtir, þarna eru skemmtileg skot til að geyma smáhluti.
Kaðli hefur verið vafið utan um stigann – þarna er hugað að hverju smáatriði.
Herbergið er stórt og er bæði leikherbergi barnanna og fjölskylduherbergi þar sem fjölskyldan getur átt góðar stundir saman.
Snillingarnir sem standa að baki þessu dásamlega herbergi er hönnunarfyrirtækið Kidtropolis en þau hanna allt frá húsgögnum upp í heilu herbergin og hafa nýlega kynnt á markað MyDoor, hurð sem þú kaupir tilbúna og sagar sjálf/sjálfur fyrir.
Litla hurðin kostar 47 þúsund ómáluð og 62 þúsund máluð. Einnig er hægt að kaupa hurð með litlu hurðinni nú þegar í. Sniðugt!
Ef einhver er í framkvæmdarhug og langar að gera svolítið ævintýralegt barnaherbergi þá er ég til í að mála það!
